摆噱头
沪语朗读：邵名和
摆噱头
作者：李大伟
沪语改写：丁迪蒙
旧上海个市井文化搭流氓文化几乎是源与流个关系，杜月笙个口头禅往往就是民间口头禅，因为伊是市井“模子”，譬如“人生下好三碗面：“手面、场面、情面”。
上海人特别注重面子，男人出门两包烟：牡丹牌：内插袋，蹲坑自用；中华牌：透明上衣袋（当时个的确良衬衫），出门敬客。两套服饰，勒屋里着一套，汗衫背心裹老棉袄，可以是千疮百孔个，出门呢，则是焕然一新个出客衣裳，俗称“皮子”，又叫“行头”，搿是演员个戏服，换新衣裳就叫“翻行头”。
皮是壳，皮子就是外套，老底子警服叫老虎皮。皮子，大概是被面子个缩写，上海人骂人勿要面孔：“侬面子勿要，夹里也勿要了”，只剩下赤膊戴领带了。
比翻行头还要夸张个，就是摆噱头。上海有顺口溜：“噱头噱头，噱勒枯榔头”，标准像侪是头颈以上个特写。介绍女朋友，媒人带拨对方个，往往是大头照，头颈以上。胸部以上是X片。剃头费要比汏浴费贵，面积小，收费多。
上海人注重面孔。雪花膏是搨面孔个，假使“雪花膏揩勒屁股浪”，搿是属于“戆大扛木梢——吃力勿讨好”，好比是“暗弄堂里塞火腿——有眼勿识泰山”。
男人出门，先要到台盆浪个镜子里去探探头，用木梳梳梳头，像划鳝丝一样，划出三七开。出门去看朋友，搨眼豆油，假使是异性，搿记开销就大了：搨发蜡，像山东厨师拉土豆拔丝一样，拉出个飞机头个造型：“前冲三”，挺刮得像是硬板纸，像煞戴顶鸭舌帽，搁块砖头也下勿来……
女人呢，涂指掐、描眉毛、装眼睫毛，最隆重个是还要做只头，勿是装榫头，而是要噱头。回头率高勿高，就在于噱头好勿好。相当于新闻个标题，收看率高勿高，就在于标题是否吓人倒怪。
当过一段辰光记者，人民广场越剧角，夜到就是一眼“拉拉”个同志角，我是报道个第一人，大字标题：“嗲声嗲气，搔首弄姿——搿搭个男人娘娘腔”！
点睛之笔，妙就妙勒噱头浪！
80年代末，金庸个武打小说风靡九州，盗版书蜂拥而起，我大学同班同学钱建忠开了爿书店，专卖武打，门帘忒小，勿得勿勒门前个走道浪，撑起块三夹板，竖写双排黑字，像西装个双排钮子：“月黑风高，杀人越货”，为武侠小说个点睛张目：攻其一点，勿及其余，挂一漏万个概括，过路者勿由得收牢脚步，忍勿牢探头相询，生意爆棚，夜里忙勒清点库存盘账，没空搭阿拉谈理想。
歇业以后，建忠闭门练字三十年，练成一手魏碑，从蟹爬字到书法家，强势崛起。假使当年书店面前个小黑板，写个是今朝个魏碑大字，再添个副标题：武侠来唻！惊煞钟馗，吓煞小鬼，吓出内伤，大小便失禁。就好比卖酱瓜个六必居，店招是严嵩个，勿失为一段佳话。
想起大学时代，全寝室汏印照片发了点财，集体出游杭州，到楼外楼去单点一条西湖醋鱼，端上来一看居然趴勒两爿！以为两条，开心煞了，没想到吃掉一爿，裸露出盘底个白瓷，原来是一条鱼劈成了两半爿！搿就是“噱头”了。
……大学毕业，我华东政法学院个朋友：日里向打离婚官司，晚到卖鸳鸯丝袜。我呢，日里向做记者，夜里向卖过西瓜，其中有兰州蜜瓜俗名叫伊丽莎白。当年出国热，上海人未必晓得武则天，却侪知道伊丽莎白是英国女王，我就顺势而为，竖起块厚纸板，写好：“伊丽莎白，缺点太甜”！再顺风借力：“吃了蜜果上火，覅忘记西瓜败火”——搿叫一拖二。但是西瓜个优点，总勿及伊丽莎白个缺点，好比美女蛇个回头率，总归要比良家妇女个高。男人勿坏，女人勿爱，妖精总归比正经个要俏丽。北京人就更幽默了，奥拓个后窗浪贴勒“覅看我矮小，我个大阿哥叫奥迪”，我从此永远记牢了奥拓。
我同时兼职企业策划，曾经充当慈溪制药厂个公关部经理，厂个拳头产品——皮炎平，是皮肤溃疡个辰光涂个，参加广州全国医药交易会，我找来一张玉照：一个意大利女郎，一头黑颜色长发，半透明个丝巾，露出了丝滑发亮个皮肤，我勒图片下头斜拉一条字幅：“好衣裳勿如好皮肤”。作为皮炎平个广告语，做成功单页个日历，广为散发，卖个就是噱头……
好面在于浇头，标题在于噱头，噱头比内容更加重要呀。
图片来自网络
往期回顾：
“上海言话讲起来”旨在传播沪语，若有不当之处，欢迎留言指正。
感谢您的支持转发，欢迎关注本公众号