有一种思念，勿联系，勿打扰

沪语朗读：孙维陵

朗读者

有一种思念，勿联系，勿打扰

来源：禅茶一味

改编、朗读：孙维陵

推荐：丁迪蒙

勿晓得侬心里向是勿是也有迭能介一个人，或许曾经是呒没啥个言话勿好讲个，随时随地可以去寻伊、去麻烦伊，现在呢，却只好悄悄叫个勒双方个好友列表里向，勿去删脱，却再也勿联络了。

侬还是会得难板去点开对方个朋友圈，看看伊现在个情况，暗暗叫个猜测伊个心情搭仔生活个，不过呢，像“侬现在勒勒做点啥”搿能介个言话，却一直勒对话框里写好又删脱了。

明明老底子可以邪气自然个搭对方开开玩笑，可以东一句、西一句个茄一日天个山河，伊勿回复侬也勿会得心焦，搿能介个关系让侬觉着邪气踏实、邪气安心个。但是，勿晓得从啥辰光开始，㑚茄山河个频率变得越来越低了，侬寻对方个辰光，会得横想竖想用个词语是勿是妥当，而伊假使勿回复，侬就会变得情绪比较低落，侬想，我一定是打扰到伊了。

成年人之间个关系有辰光是勿大牢靠个，就算是曾经一道走过一段路，就算是勒成更半夜相互交换过心事，也难以抵挡累积起来个勿断流失个辰光，联系少了，变得勿大交流了，也就越来越疏远了。就像阿信歌里向唱个：“勿打扰，是我最后个温柔，”勿晓得听哭了多少人。有眼关系勿可避免个已经是越离越远，再想用力去捉牢也无济于事，要末，就搿能悄悄个分手伐！

最初勿相识，最终勿相认。

从前看到过一段言话，大概个意思是，跟啥人侪勿要好得忒快，蛮多人开始觉着认得得忒晏，最后却是变成了到死也勿再往来，勿妨慢一眼，慢慢叫去了解，慢慢叫认得对方，慢慢叫熟悉，慢一眼，可能可以陪伴得长一点。

伊个辰光勿明白当中个含义，觉着人搭人之间个交往，只要付出真心就可以了，侬对人家好十分，最起码人家会得还侬一分个。勿过，后首来再越来越明白，人搭人真个是勿一样个，有眼人个心哪能捂也捂勿热，有些情感，从碰头开始就命中注定要分离个。

从前，欢喜过一句言话：“趁了阳光正好，微风勿燥，去看侬想看个人，去做侬想做个事体。”现在呢，只觉着搿种状态实在是忒奢侈了。

人总规有呒没办法个辰光，总规有邪气多个无能为力个事体，有眼人，侬想看也看勿见，也勿能看见，有眼人呢，侬想爱却是勿能爱，也爱勿到。多少黑名单，侪曾经互相讲过“明朝会”个，多少现在勿打扰、勿联系个名字，勒勒无数个翻来复去睏勿着个夜到，讲勿出口却侪勒勒心里向。

有种思念叫做勿打扰，有一种爱叫做勿联系，经历过个人是侪懂个呀。勿是勿摆勒心浪，更加勿是勿再想起，只勿过是暗地里拿迭个人、迭个名字、搿份感情，侪囥了心里向个角落里封存起来了。因为，阿拉侪要拿眼门前个生活过好，有眼人碰着过就够了，剩下来个日脚嘛，就算了。电影《后会无期》里向讲：“欢喜是放肆，但是爱是克制。”勿相见，再可以勿相恋；勿相知，再可以勿相思；勿相伴，再可以勿相欠；勿相惜，再可以勿相忆。

毕竟只有小小囡再会得又哭又闹，大人呢，勿是勿痛，只必过是成熟了，所以就算眼泪水已经勒眼框里向，也还是会得拿下巴微微个抬起，笑咪咪个看牢侬离开。放勿下来又能哪能呢，进一步，呒没资格，退一步，又舍勿得，葛末，就勒勒角落里向，安安静静个看侬个喜怒悲欢，祝福侬，也为自家留下来最后个体面搭仔尊严。

有点关系个最好结局，齐巧就是呒没结局，相濡以沫，勿如相忘于江湖。勿联系，勿打扰，一别两宽，愿君安好。

精彩回放：
择校勿亚于择偶（三）
择校勿亚于择偶（二）
择校勿亚于择偶（一）
雪花的快乐
济南的冬天
夕阳无限好，句号
晨起慈心祝福

图片来自网络