勒地铁里向看书 / 四六文摘

沪语朗读：朱友好

朗读者

勒地铁里向看书

来源：夜光杯

作者：王辉城

改编：郭莉

朗读：朱友好

推荐：丁迪蒙

前段辰光，豆瓣网浪有个姑娘个像册突然之间火起来了。像册个内容是啥呢？是平常辰光勒海北京个地铁里向看书个乘客。伊勒上下班个路浪向，拿仔手机，邪气小心个拍了迭眼勒狭小个空间里向安静看书个乘客。

看个书内容是各种各样个，有个是轻松愉快个小说，有个是邪气深奥个学术著作；看书个方式也是蛮有时代特色个，有种人用纸质书看，也有人是看电子书个。我看了迭眼照片，心底里是邪气个感动。

看书是桩蛮奢侈个事体。迭个道理，我是工作之后再领悟到个。人一旦进入了工作状态，所谓个“时间”，就勿再受自家个控制了。常规个工作、突发个事务、公司里向各种个会议，还有一眼勿可避免个社交活动咾啥……侬看呀，大大小小个事体，就占据了一日天里向大部分个辰光。想要抽出一两个钟头，看一眼自家欢喜个书，是几化困难呀！欢喜看书个人就只好见缝插针，利用一切个零零碎碎个辰光来阅读了。

对我来讲，乘勒地铁浪是看书个蛮理想个场所。自从加入目前个公司以后，我每日天用勒地铁通勤浪个辰光，起码是一个钟头，要是拿迭眼辰光侪用勒去刷手机，葛末就忒浪费了。所以呢，我一般是带只Kindle，或者呢，就带个两本书勒身边。Kindle是电子书，要做点手写个笔记勿大便当，所以，可以用来读一眼轻松愉悦个小说；而纸质书，就可以直接勒上头划划写写，便于思考眼有深度个，所以呢，就用来读欸种深刻个、知识含量高个社科类哲学书。

我今年读过个勿少书籍，侪是勒地铁浪向读个。

我勒地铁浪读过个小说，有列夫·托尔斯泰个《战争与和平》、紫式部个《源氏物语》、松本清张个短篇小说集《驿路》咾啥。其中，拨我印象最深刻个，是上海个九零后作家王占黑个小说集《空响炮》。迭本书字数勿多，大概十万字左右伐，里向有篇《演说家吴赌》写得蛮有意思，讲吴赌呒没正经工作，每日天定时乘一部公交车，从始发站一直乘到终点站，也呒啥事体，就立勒卖票子个地方搭乘客去嘎嘎山湖，讲争讲争。好像搿能就让吴赌勒伊自家个“演说”里向寻到了生活个乐趣。不过，迭个毕竟是忒无聊了，要是伊欢喜看看书，又哪能会弄得搿种腔调呢？

每条地铁线，侪有伊自家个客流特点。我勒人民广场上班个搿一年，从上海南站进站乘一号线。南站个人多得来是像潮水一样。进到车厢里，基本浪是连手也腾勿出来，低头刷手机也邪气困难，覅讲包里向翻书出来看。还算好，徐家汇站头一过去，车厢里向就会得一记头空出交关，葛就好拿出Kindle来看小说了。告老有人用“轧得像沙丁鱼罐头”来形容地铁个早、夜高峰。调过工作之后，情况就明显好转了，勿关是三号线，还是十二号线，人流量要少脱仔交关，车厢里个空间就比较宽舒，还常庄有只位子坐坐，阅读就更加方便了。

明朝辰光，有叫吴从先个人，伊有得《赏心乐事》五篇。其中有一篇写个是看书辰光个理想条件，譬如讲：读“史”宜映雪、读“子”宜伴月、读“佛”书宜对美人、读《离骚》宜空山悲号、读诗、词宜歌童按拍咾啥。还讲，要是调了别个场化，环境勿一样了，葛末得到个意趣搭仔享受也就勿一样了。

但是，摆勒现在个社会看，搿能个阅读方法，雅倒是交关雅，限制也实在忒多了眼，要想全部实现，是桩做勿到个事体。也或者，一定要勒顶顶理想个环境下头再去看书，总归会得拨人家怀疑，是勿是勒为自己个懒惰寻只借口呢？

葛末，地铁浪也好，书斋里也好，“何时非散帙之会，何处当掩卷之场”。书中日月长，阿拉完全勿必纠结于环境，只要真正进入到书里向去了，自然就会得心无旁骛了。归根结底，读书最终个目的，还是为了映照精神，省察内心呀！