风流个人啊，侬现在勒海啥个地方？
沪语朗读：高芸
朗读者
风流个人啊，
侬现在勒海啥个地方？
原创：桂一鹤
沪语改写、朗读：高芸
指导、推荐：丁迪蒙
前两天，一家头去了趟苏州，勒“绿柳才黄半未匀”个早春。上趟子到苏州去，大概还是2010左右个辰光，眼睛一眨，十年快了。
印象里向最典型个江南就是苏州，风吹到搿个地方就觉着是黏嗒嗒个，雨落到搿搭就缠成了线。园林里向有假山，小轩窗个后头有侬猜勿出个故事，青石板、蜿蜒个巷、弄，泊舟向晚个地方，还有小桥、流水、篱笆墙。真是个好地方呀！
这趟到苏州，只去了拙政园搭仔留园。一大一小；一只阔气，一只秀气；一只是繁华个深处，一只是曲径通幽。
像拙政园搿能样子个园林，啥人会得勿欢喜呢？来世就是勒勒搿个地方做一颗小草，我也愿意个呀！！！
平江路，本来是呒没打算去个，但是有家馆子里个物事老想去吃个，后首来还是去了。事实证明，搿种地方已经再也勿是像我搿种中年人应该来个了。十年前头，搿是块邪气文艺个地方；十年后头，走勒搿条路浪向，却再呒没看到一家想兜进去看看个店。
所以讲啊，是啥个辰光，自家一记头就觉着自家已经是中年人了呢？——就是到了平江路，发现自家已经融勿进去个辰光。
搿趟，最最重要要去个地方，就是寒山寺。
上趟来，一到寒山寺，我就邪气开心个勒勒张继个雕像前头拍照，手之舞之足之蹈之。
搿趟来，第一个下半天我就去了寒山寺，首先勒大雄宝殿前头，礼佛跪拜，又勒寺庙里向随意兜兜。游客老少个，寺庙笼罩勒夕阳余晖下头，显得邪气安静。连得寺庙里个猫，也好像已经入定，拿颠倒梦想放了下来，与世再也无争。有游客走过去撸撸伊，伊也邪气个勿耐烦。
阿拉总归是勒海诗里向读“夜半钟声”，但是我从来也呒没听到过。几年前头，去过无锡个南禅寺，夜到也是邪气幽静个一片。倒是有两只船，勒勒烟云弥漫个水面浪向飘，就算是有几盏渔火伐。所以，当天夜快头，快点回转去酒店睏脱一觉，大概夜到9点多钟，又去了寒山寺，等待听伊个钟声。
勒勒春寒料峭当中等了交关辰光，寺庙里个师傅讲，侬来得忒晏了。
我当时个第一反应，竟然是，勒勒日本富士山下头，接到了当日天禁止登山个通知。
是勿应该有执念，是遗憾，但也可以留一眼美好。
但是有眼辰光，人就是偏执。我就是偏要去听寒山寺个钟声。
好在师傅搭我讲，第二天清早五点钟还会得敲钟个。哦，总算还有弥补个机会。
我终于勒勒第二天清晨5点半左右，听到了古朴、浑厚、深沉个钟声，虽然伊并勿是“夜半”个钟声。清晨四五点钟，我勒等待个辰光当中，听着了勿绝于耳个鸟鸣，看着了东方一点点变白，邪气激动个分享了钟声，了却了一直以来个愿望。
可能勒我个余生当中，再想起苏州，想起寒山寺，读到唐诗，侪会得想起，伊个钟声敛春色个清晨。
假是侬要问我后首来呢？我先是兴奋得唻，勒勒原地蹦蹦跳跳兜圈子，冷静下来以后，就跪到了寒山寺个门口头，邪气虔诚个磕了三只响头，立起来，拍拍身浪向个尘土，转身走向了远方。
勒搿段辰光里，我去看了苏州博物馆，又兜了兜诚品书店，最后告别苏州，离开了江南。再也呒没辰光去听昆曲搭仔评弹了，但是，伊首《牡丹亭外》却一直勒海耳朵边浪萦绕。
上海言话叙身边事体
吴侬细语吟诗词歌赋
往期回顾：
图片来自网络
欢迎关注本公众号