到上海去
沪语朗读：王幼蘭
朗读者
到上海去
原创：胡海明
来源：夜光杯
改编：郭莉
朗读：王幼蘭
推薦：丁迪蒙
到上海去！搿句言话常庄让市区个人听得一呆，觉着邪气滑稽：侬本来就勒上海个地界里向，是“根正苗红”个上海人，哪能好拿“到市区去”叫做“到上海去”呢？
也难怪，住勒“都市里个村庄”个郊区朋友，上个世纪七、八十年代，既呒没高架、也呒没地铁轻轨，到市区去只好乘长途汽车，长途公交车离市中心忒远，一般侪要半个钟头朝上甚至于是一个钟头开一班，到市里向去一趟，单程起码要两三个钟头。要是住勒崇明个呢，就更加勿便当了，总归要住脱一夜，再赶第二天一早个轮船回转去……所以，侬讲，到一趟市区里向，像勿像外地人到一趟上海呢？
我欸歇辰光住勒老闵行，勒闵行个商业部门工作。由于工作个特性，员工休息日勿是统一勒礼拜天，而是轮休个。我伊个辰光还属于“快乐的单身汉”，休息基本浪侪安排勒人家个工作日。
郊区因为地域局限，文化娱乐、商业设施侪比市区落后，因此，休息日最大个乐趣就是到市区去购物、荡马路。老闵行通到市区个公交车只有一条：徐闵线，所以去一趟市区邪气有仪式感。搿日天，我会老清早就起来，假使勒路浪向碰着熟人，就会得用老大个声音讲：“我到上海去呀！”乘了一个多钟头个巨龙公共汽车，到终点站徐家汇再下来。
我下车以后，一般侪会选择步行，沿牢仔华山路慢慢叫走，从前辰光，车辆并勿是老多，再加上是平常工作日，所以早浪八、九点钟个马路，是车少人稀，邪气安静。
勒勒粗壮茂密个法国梧桐笼罩下，我沿牢淮海中路一直朝东，路过襄阳公园，我总归习惯弯进去遛一圈，迭歇辰光广场舞还呒没流行，公园里邪气安静。我寻只长条椅子坐下来，靠勒椅背浪，闭好眼睛，勒绿荫里向呼吸呼吸新鲜个、有点甜味道个空气，听听小鸟歌唱，让自家个身心彻底释放。搿种感觉真是惬意呀！闭目养神半个多钟头以后，我继续上路，到老大昌食品商店，买两包盐水鸭肫肝，一路走，一路细细叫个品味。再一路走到南京路浪个上海老图书馆。我特别欢喜搿搭个报刊阅览室，里向有交关报刊勒郊区图书馆是难觅踪影个。我常常买两只咸面包，然后呢，就一头扎进了“知识的海洋”，就像久旱逢甘霖个小苗，拼命个吸收养分！夜快头了，我就到大光明去看场电影，体会体会顶级影院个勿同凡响个视觉享受。
搿个辰光，我就会得想，勒市区里生活，真个老充实个！
电影散场，已经是夜到七、八点钟，来煞勿及跳到26路电车浪向，朝徐家汇方向赶——徐闵线个末班车是夜里9点钟，要是赶勿上，葛末就意味着今朝夜里要勒市区做个“流浪者”了……等乘上了轧满了人个公交车，搿个感觉就像钻到了邪气昏暗个隧道里向，眼睛里看到个侪是大棚搭仔农舍，呒没了市区个繁华搭仔活力。睏勒床浪，耳朵旁边又响起朋友讲个：宁要市区一张床，勿要浦东一套房。
一切侪勒弹指一挥间。
如今，高架、轻轨、地铁、公交一应俱全，郊区个人到市区去，再也勿会得兴师动众，欸句逻辑错误个口头语“到上海去”，也逐渐也拨大家淡忘了——郊区个房子已经成为了住勒市中心个“上海人”个向往之地，交关“上海人”侪想到郊区去落户，搿能个景象让我个内心充满了自豪——生活勒郊区，其实是邪气好个呀！
往期回顾：
图片来自网络