故里春秋（二十一）
作者：朱海洪
沪语改写：边秦翌
沪语讲述：王浩峰
第二天，金伟成穿仔双小皮鞋来寻阿跷。阿跷一句闲话也勿讲，马上拿伊个小皮鞋擦得晶晶亮，旁边个小朋友眼乌珠侪瞪大了，邪气眼痒。
有辰光呒没生意，阿跷就拨伊个拐杖隑勒墙角，自家懒洋洋个靠勒墙壁坐勒地浪向，看人来车往，朝对面“新闸救火会”个红房子发呆。太阳落山，伊再撑起拐杖，揹勒鞋箱，勒勒夕阳个余晖里，拖一根长长个背影一家头回去。
春去秋来、朝至暮归，阿跷一直勒“天乐”门口头摆摊擦皮鞋。伊个皮鞋摊搭对过个红房子摆勒一道，倒是十字路口个一道风景。
终于有一天，红房子还勒海，阿跷消失勿看见了。我勿晓得阿跷为啥消失；我只晓得，阿跷消失了，擦皮鞋迭个行当也就消失了。
真个！从此以后，我就再也呒没勒勒上海马路浪看到过“擦皮鞋”了。
“剃头喽！”
弄堂里飘上来一声吆喝，姆妈推开窗朝下头喊一声：“长脚，剃头！”
“长脚”是剃头师傅，扬州人，高高瘦瘦，背有眼呴。
剃头匠里扬州人最多勒，大约摸有得70%伐。扬州出美女，也出剃头匠，两者之间是勿是有得关联，待考证。但是剃头手艺个兴盛搭仔头发有的关系，搿是铁板高头钉钉子，确凿无疑个。
古代个辰光，汉族男人头发长了是勿能剪个，要拿长发盘束于顶，用白布包起来，号称是：“身体发肤，受之父母，不敢毁伤，孝之始也。”
汉人发肤个毁伤始于满清入关。
满人本来是东北个游牧民族，以打猎为生。因为打猎个辰光头发会得拨风吹散挡牢眼睛，还容易缠牢树枝，勿利于射箭搭仔追赶猎物，满族男人就拿额角头一圈头发剃清爽，脑袋后头个头发扎一条长辫子。习惯成自然，梳辫子就成了满族男人个标志。
游牧民族得到了天下，要来掌控农耕民族，心里勿是最最踏实，生怕拨汉人同化了去，满清政府个第一步，就要求所有个臣民“剃发易服”，等于是让汉人满族化。汉族搭仔其他少数民族侪勿肯，就奋起反抗，最后遭到清廷个武力镇压。
1645年，清军围攻扬州，史可法带领军民抵抗七日七夜，最后寡不敌众，城陷；史可法拨捉起来了，伊勿肯投降，最后拨杀脱了。清军损伤惨重，报复性个纵兵屠掠，十日封刀；扬州城尸横遍野，人间地狱。
搿就是历史浪有名个“扬州十日”。现代作家郁达夫曾经作诗：
三百年来土一丘，史公遗爱满扬州；
二分明月千行泪，并作梅花岭下秋。
“扬州十日”之后，清政府下令，“留头勿留发，留发勿留头”；规定所有男人个脑袋必须要弄成功满族人发型个样子，就是剃额角头梳辫子，否则小命勿保。
从此有了剃头匠。
最开始个剃头匠是朝廷个公差，相当于搿歇个公务员啦，坐镇剃头棚。
剃头棚里向摆勒一只木台，旁边竖一根旗杆，旗杆浪向挂勒责令剃发个圣旨。愿意剃发梳辫子个就坐到木台浪；啥人敢违抗，“留发勿留头”。剃头匠拨违抗者个脑袋按勒木台子浪，只听到“咔擦”一刀，然后就拿人头厾到旁边个圆桶笼子里向。
“留发还是留头”，大概是蛮让人纠结个，只要有得反抗个，基本浪就呒没头了呀。所以前明遗老雪庵和尚曾经作了一首《剃头诗》来讽刺：
闻到头堪剃
而今尽剃头
有头皆要剃
不剃不成头
剃自由伊剃
头亦是我头
请看剃头者
人亦剃其头
二百多年之后，“剃头者”自家头浪个辫子也拨辛亥革命剃脱了。
回过头再讲剃头匠，因为要剃头而有剃头挑子。有一句俗话，讲“剃头挑子一头热”，就是剃头个原始形态。
挑子热个搿头是之圆桶木笼，曾经装过人头，后首来调成了小火炉。炉子浪摆一只大圈口个黄铜盆，盆里向盛热水，木桶下头三腿鼎立，其中一条腿往高头延伸成为旗杆，杆浪向肯定呒没老底子个圣旨了呀，反而挂一块钢刀布搭仔毛巾。冷个伊头是只红漆长方凳，代替了老底子砍头辰光起砧墩板作用个木台子。凳腿之间夹置三个抽斗，最高头个抽斗放钞票，钞票从凳面浪开个小小个长方形洞洞里塞进去，第二搭仔第三只抽斗分别放置围布、刀、剪咾啥个工具。剃头匠用扁担拿两头一串，挑勒海走街串巷。
走发走发，走出了理发店、美发厅，甚至美发美容院。
往期回顾：
图：网络 / 编辑：渺渺