舞台上下看变化
沪语朗读：潘慧芳
作者：张国庆
来源：新民晚报十日谈
上海话改写：郭莉
朗读：潘慧芳
要讲起我个名字“国庆”，还是蛮好白相个。我养勒1955年10月1号，爷娘搭我起个名字叫“志浩”。我爸爸是京剧团演员，姆妈是江南杂技团演员，所以我从小跟牢爷娘到处“跑码头”，一直呒没报户口。到了四岁辰光回到上海，外公抱我到派出所，啥人晓得事到临头，名字想勿清爽了，葛末既然正好是国庆节养个，就叫“国庆”算了！
“国庆”迭个名字，有个好处，就是大家侪记得牢。一到国庆节，朋友们侪会想着跟我讲一声：生日快乐！反倒是阿拉屋里向自家人，常庄忘记脱，总归是一家门开开心心过国庆节，想勿着搿日天也是我个生日。不过个人生日，勒勒国家大庆面前，当然算勿上啥个啦！
阿拉迭个一代人，是实实在在看到转变，看到国家发展进步个。譬如有一样物事，现在交关人侪勿晓得了：“工业券”。当年困难时期，交关民用工业产品，比如罐头、玩具、家具咾啥，侪要凭工业券去购买个。工业券根据工资额度发放，每5块洋钿配一张，记得我姆妈个工资是60块，所以配了12张工业券。现在，啥地方还要迭个物事呢？
我是个演员，对我来讲，顶顶直观个变化，就勒勒演出舞台浪向。先讲小小麦克风吧：我小辰光跟爷娘跑码头，舞台中央吊勒一只麦克风，阿拉叫伊“吊风”。八十年代我进了滑稽剧团，迭个辰光有“台口话筒”了，舞台前头一圈个当中、左边右边各有一只，侪是铜圈话筒。搿种话筒特别容易嚣叫，离得近了就叫，离得远了，又听勿清。再后来总算有了电容话筒，收音面积扩大，台下可以听得清清爽爽。发展到现在，上台唱歌讲言话，伊眼新设备我侪看也看勿懂了。
再讲讲音响效果：现在侪是电脑程序，可以一分一秒计算，精确得勿得了。从前阿拉侪是后台人工操作，比如台浪向演员要打一枪，枪声就要后台敲出来，万一配合勿好，迭个一枪就尴尬了，可能要多打两枪。又譬如抽耳光个声音，后台人员要用空抽皮带来模拟，落雨个声音，是用黄豆筛子摇出来个……现在搿种侪是电脑音效做个了。
勒勒八十年代初期，滑稽戏《七十二家房客》个布景道具咾啥，侪是邪气陈旧个物事，一幕一幕之间衔接，台浪向换景个辰光邪气长，观众要勒勒黑黜黜里向等几分钟，乃末再好看到舞台灯光重新亮出来，大幕拉开，布景侪变了。2006年，我跟上海人民滑稽剧团到日本大阪、东京公演《七十二家房客》，迭个辰光布景就简单了，是一只像陀螺一样个转台，几只场景侪事先做好，只要一转，场景就变了，阿拉演出就方便交关了。
拍戏就更加覅谈了。从前拍电影，用个是胶片，迭个物事要外国进口，是用外汇买来个，所以大家用起来邪气紧张。电影拍摄前要做预算，胶片长度侪要算好。一组镜头预定拍三只，三只拍勿好，就只好勿要，搿能就浪费了。所以一定要先排练，阿拉叫“走戏”，走戏走个十几遍靠廿遍，侪是家常便饭，演员也邪气疲劳。现在用个侪是数码设备，搿种问题根本勿存在了。
我讲了介许多，总之是想讲，种种变化，要是呒没国家强大力量个变化，是做勿到个。迭个是我真实切身个感受。新中国七十年来，物质条件变化、社会变化实在太大了。我为自家有“国庆”迭个名字而高兴，也祝愿阿拉伟大国家更加繁荣富强！
上海言话叙身边事体
往期回顾：
“上海言话讲起来”旨在传播沪语，若有不当之处，恳请留言指正。
感谢您的支持转发，欢迎关注本公众号