天女（下）
沪语朗读：顾敏
天女（下）
选自《新说山海经》
作者：张锦江
沪语改写：丁迪蒙
朗读：顾敏
天女暗暗叫下了决心，要再次去会一会搿只四眼人面个妖鸟。
有一日天，青燕带牢仔一群燕子勒森林里向捉勒天空浪向飞个一团团个小虫，搿是有得透明翅膀个邪气小个蠓虫。飞燕捕食个飞行是邪气优美、富有诗意个。燕群交叉穿插，有各式各样个花样飞出来，蠓虫飞行团呢，像一团雾状个物事飘来飘去，就勿肯散脱，飞燕勿依勿饶、勿停个反反复复个一边飞一边勒啄搿眼小蠓虫。
就勒搿个辰光，一只鸟飞过来，伊直接扑向了青燕。
来者不善，就是搿只四眼人面鸟。青燕呢，伊呒没搭四眼人面鸟缠勒一道打斗，而是飞到一棵树旁边落下来，显出了天女个真身。四眼人面鸟扑打翅膀停勒一棵有得一百多丈高个大树浪向，勒树干一人高个最低个地方有一枝邪气粗个枯脱个树干子，搿只妖鸟歪仔脑袋，脚爪紧紧个抓牢枯杆望下头看。妖鸟勒上头，天女勒下头，距离邪气近，伊拉对看勒海。
天女问：“鸟仙，有啥个仇，啥个恨啊，要追我杀我到搿搭？”
妖鸟讲：“还吾个头来！”
“鸟仙，小女子向来是以善为本，以爱为先，从勿杀生，何出此言？”
“黄帝霸道，助纣为虐，逆天而行，兵戎相见，尸骨遍野，哪能讲侬勿杀生？”
“大神相争，是非难定，小女子散尽百花以阻帝争之灾，功力殆尽，坠落人界，勿应该怪罪小女子个。”
“假使侬勿施百花之法，蚩尤勿会兵败，也勿会断头、命丧，蚩尤个切齿之恨，一定要复仇个！”
“鸟仙错怪我了，更勿能因此而施妖术，使得山野赤地大旱，祸及苍生，搿就是错上加错了。”
四眼人面鸟长叫一声，叫声是邪气个凄厉：“还吾个头来……”然后伊向天女飞扑过去，张开了大嘴巴要咬。
天女摇身一闪，化作了青燕像箭一样个窜到天空浪向去了。四眼人面鸟追牢仔飞过来了。
搿个辰光，数勿清个燕子拿青燕护卫勒当中。其它个，成千上万只燕子拿四眼人面鸟围困起来，成为了密不透风个燕墙，妖鸟勒千千万万只燕子嘴巴个狂啄下，勒千千万万只燕子脚爪个撕勾下头，羽毛拨扯啄得一片片脱落下来，尽管伊用嘴巴拼命个吹气，施展伊个让人干煞脱个妖术，还想让搿眼燕子因为干渴而跌落下去，但是燕子们是毫羽无损，伊拉无动于衷，因为伊拉已经吃过青鸟个泪泉，嘴巴勿干了。搿个辰光，群燕狂舞，黑压压个一片，燕子个叫声此起彼伏，鸟鸣声像浪涛勒空中滾来滾去。搿一阵个群燕斗妖鸟个情景，拨一个大神看得清清爽爽。伊勿是别人，就是田神，伊个名字叫叔均。
四眼人面鸟个羽毛已经拨燕子啄勾得精光，伊像只肉球从空中落下来，已经勿会得再飞，遍体鳞伤，目中无光，但是伊还是勒勿停个唠叨：“还吾头个来！”“还吾头个来！”
妖鸟跌落勒一块邪气硬个石头浪，还是勿甘心，一边扑腾，一边啰嗦啊。
田神叔均走过去，用伊个脚拨一拨妖鸟，讲：“侬啊，毛拨剝光个害人个鸟，哪能，还想要害人啊？”妖鸟呢，就地一滾，变成一只甲壳虫飞脱了。
只看见，蓝莹莹个天空浪向，多得数勿清个燕子护牢仔青鸟飞过田神叔均个头顶。田神对牢仔空中个青燕讲：“我去向黄帝复命了。”
山浪山下个山民下拜叩头，只听见伊拉勒喊：“神啊，请侬朝北方去伐！”
河浜里清澈个水拿干枯个土地浸润，逐渐向北流去，河浜个两岸边长出了一丛一丛个叶子是重生个、开小黄花个奇草，结个果子搭菟丝子个果实老像个，女人假使吃了伊，就会得变得邪气漂亮，讨人欢喜了。
青燕搭仔燕群呢？已经是飞得无影无踪了。
点以下文字即有精彩回放：
图片来自网络