十日谈 | 云间超商购物忙
沪语诵读：冯玉红
来源：新民晚报
作者：郑自华
沪语改写，诵读：冯玉红
疫情期间，呒没办法逛兜商场，于是我只好去逛逛“拼多多”了。
“拼多多”，其实就是一家超级商场，只不过伊是开勒网浪向个。
进了拼多多，我看到交关熟悉个朋友侪勒里向买物事，忒亲切了，搿个就像勒老式公房，邻舍隔壁拎仔大包小包回转来，喜气洋洋个，感染了大家，就凑上去问，买了点啥？价钿哪能介啊？勒啥地方买个？看到包里有安吉春笋、新疆库尔勒香梨、阿克苏冰糖心苹果、德州扒鸡，就问，味道哪能介？包邮伐？快递要多少辰光？听邻居讲是回头客，第二趟买了，就快点下单。后来发现，微信里个好友勒“拼多多”里侪成为了朋友，茄山河个话题自然又多了一项内容。
“拼多多”个魅力就在于拼。到商场购物，经常发现多买某种商品便宜，单买贵，但是多买了实在又勿需要，于是，现场顾客就自家“拼拼拢”，也有买了以后拿转卖发拨人家，但是往往会引起人家个误会。勒“拼多多”里，看到欢喜个物事，发起“拼单”，为了早眼拼成功，就通知朋友加入拼单；假使有人已经发起拼单，尽管搭伊个人是素昧平生个，也可以去主动拼一记，拼好单了搭对方挥一挥手，勿带走一片云彩。拼单成功，后台马上会通知，然后，就等勒海收货唻。有人讲，迭个拼一记好省脱多少钞票啦？实际浪伊拉勿晓得，一天省一把，三年买匹马。居家过日脚勿就是搿搭省一眼伊面节约一点个？
“拼多多”有个神奇个功能，假使无意当中多看了一眼，其实就是点了某个商品了，一路走来各种价钿、各种款式、各种牌子个同款商品出现勒侬面前，有可能连续出现好几天，弄得侬勿好意思勿下单。
逛“拼多多”，经常还可以看到“侬拨选中了”，或者“侬拨砸中了”“勿要错过迭个”,或者已经有多少优惠券拨侬留好了。尽管自家晓得迭个是商家个套路，但是真情勿能拒绝啊。于是就驻足观看，看见有商品介绍，有销量统计，有照片，有视频，有个还“勒直播中”，假使需要了解详细情况，随时可以向商家咨询，再下单买下来。迭个平台个后续服务工作也邪气好，有一日看中了某品牌春秋裤，等商品送到,再晓得根本着勿落，宅勒屋里几个号头，肉多了，只好退货，而且退货勿需要理由，网浪刚刚办好手续，退款金额连同7块包邮钞票立刻就到账浪了。
有一日，一记头来了6只快递，由于疫情期间，只好到小区门口个快递架拿货，看牢搿眼快递勒发愁，哪能拿法子。齐巧郝同学经过小区，帮忙送到屋里向。郝同学是单身，平常三顿饭侪是瞎吃八吃个，疫情期间个日脚更加是过得乱七八糟。我搭伊安装“拼多多”，教会了伊哪能介使用。现在勒“拼多多”里“查看好友新动态”，经常可以看见郝同学勒勒溜达，勿是买红烧肉，就是买正宗黑脚老鸡，或者买眼猪头肉、买咸鸭蛋老咾啥。现在郝同学看到我就讲：有了“拼多多”，生活也变得有滋有味了。
往期回顾：
图：网络 / 编辑：渺渺