今朝天气暖洋洋
作者：马尚龙
沪语改写：高芸
文字修正：丁迪蒙
除脱仔二楼前头一间是正正式式朝南，冬天太阳晒得进房间，石库门其他房间基本浪侪是冬天勿暖热夏天勿风凉，冬天太阳晒勿到，夏天南风吹勿着个。搿也就是为啥，石库门有得“万国旗子”个风景，从床单到尿布侪要晾到弄堂里去个原因。搿李向，勿单单是房间小，实际浪也是房间里向晒勿着太阳、还邪气潮湿个缘故。
夏天介夜里向天热，每家人家就侪勒弄堂里向做市面。大冷天个夜到呢，啥个市面侪呒没了，大家侪缩到自家个屋里去了。但是，冷天也自有冷天介个市面，也自有冷天个风情。搿个，就是孵太阳了。
早浪向九点钟敲过，孵太阳个人就一个一个侪出来了，搬只小矮凳或者小个靠背椅子，外加一条小小个棉被头当棉垫子，勒弄堂前门人家一边坐下来。
九点之后“纷纷出笼”，搿既是地利也是天时。大清老早，大家侪勒做事体，汏面孔、刷牙齿，倒马桶、买小菜，有得好忙唻。而且，伊个辰光，弄堂里只有西北风，太阳还呒照进来。到九点钟敲过，人就空了，只要天气好，温度也就升上来了，风也小了，孵太阳，就是享受了。葛末，为啥要坐勒前门人家个一边呢？因为，石库门前门朝南，后门是朝北。也有弄堂里坐勿落了，就坐到弄堂外头个朝阳一边。
搭乘风凉勿一样个是，乘风凉老少无欺、人人有份，孵太阳呢，只是老头、老太搭仔家庭妇女、还有小小囡个福利了。学生仔搭上班个人是呒没份个。
老人是老搭档老位置，也是老花头。王家阿婆结绒线衫，张家姆妈补补丁，李家外婆扎鞋底，陆家阿娘抱仔小孙子做游戏；还有赵家搭马家个阿爷，拿仔过期个《参考消息》谈论谈论国际形势。
年代是大勿相同了，实际浪搭现在社区棋牌室门口头总归有一群人也差勿多，欢喜轧闹猛，欢喜打听，欢喜无天野地。不过，比起现在棋牌室门口个男男女女，埃个辰光孵太阳个老头老太，像煞面相要更加和善。倒勿见得一定是埃个辰光个人淳朴、现在个人刁滑，主要是话题勿一样了。埃个辰光，孵太阳个老头老太话题也是杂七杂八，但是从来也呒没股票、房价、动迁、医保、pm2.5之类，一讲起搿些事体，眼乌珠就瞪牢，喉咙就会得响起来了。
淳朴个老头老太也有拨“吃豆腐”个辰光。中浪向或者下半天三四点钟，小学生放学个途中，看到了孵太阳个老头老太，因为是途中看到个，勿是自家弄堂里个张家阿婆，赵家伯伯，胆子就大了，就会拿搿些老头老太开玩笑。隔开几步就哼起流行个童谣来：今朝天气暖洋洋，老头子老太婆打乒乓，老太婆削，老头子抽；削抽、削抽、有苗头……
交关年数以后，我一直勒海破解搿首童谣个流行搭仔意思。伊个辰光正值中国乒乓球成为世界冠军，乒乓热从小人热到老人，“乒乓”也成为流行个热词。为啥老太婆老头子打乒乓有苗头呢？大概是勒隐指伊拉个男女关系勿正常。太阳底下头暖洋洋个，男男女女窃窃戳戳……埃个年代个男人女人，哪怕是上了年纪，多讲几句闲话也会得有生活腐化之嫌个。小人也晓得是勒讽喻老头老太，所以一定是一边奔一边哼哼童谣，追也追勿上去个。
往期回顾：
農曆廿四節氣詩詞誦讀 寒露——詠廿四節氣詩 寒露九月節 唐·元稹
图：网络 / 编辑：渺渺