当代媒婆
沪语朗读： 孙蕾
朗读者
来源：随笔集《上海本色》
作者：孔曦
沪语改写：丁迪蒙
文字修正：孔曦
廿几年前头，帮小青年介绍朋友，我是老热心个，常庄勒勒夜里向拿先生搭囡儿厾勒边浪，急急忙忙个去轧公交车，跑到公园或者电影院门口头去做介绍人。路灯下头碰头个场面浩浩荡荡——介绍人一本三正经个推荐，男小人小姑娘弹眼落睛个出场。然后呢，伊拉两家头越走越远，双方介绍人横看竖看，一边讲：“搿两家头老般配个！”只不过，介绍人多数辰光是勒勒自作多情，勿是男个看勿中女个，就是女个看勿中男个。辰光谈得最长个，也不过谈仔半年或者几个号头。
近枪把，汤勿牢一眼朋友为伊拉个侄子侄囡、外甥外甥囡问东问西，我又开始管闲事了。不过呢，牵线方式已经进步仔交关。有个白领小姑娘个姆妈告诉我，现在介绍朋友，勿行见面了，只要拿微信或者手机号头告诉对方，让伊拉自家去聊。我一听，葛倒蛮好。老底子做介绍人，要轧公交车。大冷天一身热汗，大热天一身臭汗。难板叫部差头，心里向还交关肉痛。现在，做好事体个成本已经少脱交关。乃末，先加只微信，拿男小人女小人个基本情况、优点特长咾啥讲拨对方爷娘听，假使觉着可以，老早仔末，是互相报伊妹儿，后首来交换QQ号头。再告诉对方微信搭仔手机号头。女小囡A配男小囡A，女小囡B配男小囡B。过脱一枪去问问情况，假使勿来三，再重新组合，女小囡A告男小囡B去聊聊，男小囡A跟女小囡B去搭搭……讲起来难为情，忙到现在，十八只蹄髈个苗头，还是呒没。
看起来，勿见面个沟通就是呒没办法代替相亲。第一趟碰头个搿种开心或者挖塞，一见钟情或者茄搭搭，只有碰头个辰光再晓得。曾经有一个A男搭A女，伊妹儿咾短信咾聊仔一段辰光，碰仔一趟头，两家头也蛮讲得拢个。后首来，男小人就发短信拨女小人唻：“谢谢侬陪我过仔一个老开心个下半天，希望下趟还有搿能介个机会”。搿个小姑娘是乖囡呀，从来也呒没谈过朋友，老含蓄个，觉着老难为情，就回复伊：“现在是刚刚开始，阿拉先做普通朋友好伐？”男小人一看，呆脱了，搿是明摆勒海回头我嘛？后首来再一问，搿个女小囡倒是诚心诚意想试试看个。假使这句闲话是当面讲出来个，再加上娇滴滴羞嗒嗒个眼神，男小人哪能会得搞错脱呢？
现在，通讯技术发达得来，联络，的确是便当仔交关。闲话讲转来，搿种技术，可以为人跟人之间个沟通提供方便。小青年，大多数已经用惯了微信、QQ搭仔电话，习惯勒键盘浪向用手节末头“讲闲话”，阿里一天，真个面对面了，反而会得少脱一开始个自由搭仔随便。
看起来，勒信息爆炸个辰光，介绍人已经呒啥市面。我还是就此歇阁，省眼辰光伐。
图片来自网络
吴侬细语吟诗词歌赋
往期回顾：
“上海言话讲起来”旨在传播沪语，若有不当之处，敬请留言指正。
感谢您的支持转发，欢迎关注本公众号